शनिवार, 15 सितंबर 2012

गठ खुड़दी खुड़दी खुड़दी है।


गठ खुड़दी खुड़दी खुड़दी है।
तंद जुड़दी जुड़दी जुड़दी है।।

मत चिणदे कंधा कच्चियां जो।
नींई पुड़दी पुड़दी पुड़दी है।।

जे  पोंये  त्रियैं कन्ने तां।
गल उड़दी उड़दी उड़दी है।।

कुण सोगी चल्लैं -खीरा तक।
बत मुड़दी मुड़दी मुड़दी है।।

चिंद पेई कच्चियां उम्रां दी।
जिंद कुढ़दी कुढ़दी कुढ़दी है।।

गुरुवार, 13 सितंबर 2012

जां तेरा इकरार मतलबी।
 तां मेरा इजहार मतलबी।।
जिस्मां दे सौदागर मिले।
 दिलां दा कारोबार मतलबी।।
 बुरे ध्याड़े, ओखैं बेलैं ।
 निकल़े रिस्तेदार मतलबी।।
 वोटां तक मैहरम बणदी।
 हुंदी हर सरकार मतलबी।।
सच्ची गल्ल कबीरा बोलैं ।
झूठा है संसार मतलबी ।

खंगणे व़ाल़े संगणा आए।

खंगणे व़ाल़े संगणा आए।
बंडणे व़ाल़े मंगणा आए।।
 लारे, बुते प्यार -पल़ोपा
 नेता अंगणा अंगणा आए।।
पंजा सालां बाद फिरी सैह
नालु खोल़ु लंगणा आए।
 पोस्टर,अपीलां झंडे बैनर
 घरां दिवारां रंगणा आए।।
 जितणे बाद मैहरम कुसदे।
सूलियां जानी टंगणा आए।।
नंंगेयां जानुंआं जंगा व़ाल़े।
भी खंदोलुआं तंगणा आए।।

चोंहनी बखैं पपलर छाये । होये अज पराये पिपल़।।

बेशक असां पुजाये पिपल़।
पर नी असां बचाये पिपल़।।
हुण बूटे नोंये कुनी लगाणे।
सुकदे मुकदे आये पिपल़।।
 चोगां चारे कम्म संवारे ।
जिसा नगरिया छाये पिपल़।।
दूध $फल़, जड़ां छिलके।
लाजां कम्मे आये पिपल़।।
बिज नी पोयें पिपल़ां थल्लें।
कुसजो कुनी पढ़ाए पिपल़।।
गीता पढ़ी ने ज्ञान बंडाये।
कृष्णे दे हमसाये पिपल़।।
 भगवता दा परसंग सुनिये।
चूसी जहर मुकाये पिपल़।।
चोंहनी बखैं पपलर छाये ।
 होये अज पराये पिपल़।।
 पढ़ी क्ताबा मुन् नी पुछैं ।
हुंदे थे क्या माये पिपल़।।
 कुल्लू लगी पिपल़ जातर।
याद फिरी ते आये पिपल़।।

कुसी कुसी जो पंज्जा लक्की। नैहला कुसी कुसी ता तारा ।।

छोरू होये नौ दो ग्यारा।
 खपरे दे तां बज्जे बारा।।
अठां ने कदी सठ नी रल़दे ।
 इक्कियां बाईयां दा लश्कारा।।
 थे पंजा भाईयां पांडवां दे।
 साथ निभाए इक्को नारा।।
 पंज सत नी सोचणा मिल्ले।
वक्तें मारियां लखां मारां।।
इक्को इक दैं हिका सेकां।
 इक इक मिली होण ग्यारा।।
 पंद्रेह सोहल़े छिंज जे आई।
 चोंह फरलांगा पर खन्यारा।।
 वोट तां मिलणा इक्को पाणा।
 पर उम्र चाईदी पूरे ही ठारा ।।
 कुसी कुसी जो पंज्जा लक्की।
नैहला कुसी कुसी ता तारा ।।