रविवार, 21 अप्रैल 2013

दोस्तो, असां इक्कवियां सदिया जो जा दे

दोस्तो, असां इक्कवियां सदिया जो जा दे

केईयां जो नी चबणे जो टुकड़ा
कुथी कुत्ते दुधां पाड़ा दे
केंईयां दे तां फटेयों खंदाूलू
कुथी बिल्ले लेहफां फाड़ा दे
मजदूर बचारे भुखे पाहणे
बिन रोटिया पाणिये जिआ दे
ठेस वपारी नेते सारे
लोकां देयां लौहुआं पिआ दे
बकरूआं दें मास्से स्वाद नी रेहया
माणु माणुए दे मास्से खा दे
दोस्तो, असां इक्कवियां सदिया जो जा दे

नुआं जो गैसा ने फूक्की
मिट्टिया दे तेले की बचत करा करदे
बापुये जो जबरा बोल्ली
नोईयां रीत्तां पा करदे।
हिंदी प्हाड़ी सडिय़ो भाषा
अंग्रेजिया दा प्रचार करा करदे
हिंदुआं सिक्खां मुसलमानां लड़ाई
आबादिया घट रवा करदे
जन्म कुंडलियां टिपड़े सिपड़े
अज असां गुआई दित्ते
पिछले सारे भेद पुराणे
हुण असां मिटाई दित्ते
ब्याहे तांई हुण दोस्तो
असं पासबुकां मिला करदे
दोस्तो, असां इक्कवियां सदिया जो जा दे

अज नेते देशे दिया जगीरां खा दे
अफसर सारे सीरे खीरां खा दे
भूखेयां कन्ने फकीरां खा दे
अज सोई भी सुथणुए दियां लीरां खा दे
तरखाण भी लकडिय़ा दियां चीरां खा दे
अज लैला अपणेयां मजनुआं खा दियां
अज सांझे अपणियां हीरां खा दे
तिसजो जो मिल्ला दो खादे
दोस्तो, असां इक्कवियां सदिया जो जा दे

ठेकेदार सैह बजरिया खा दे
लोहे रोत्ता सिरमटे खा दे
मजदूरां दे पसीने खा दे
चमडिय़ा कन्ने सीने खा दे
हफ्ते खादे महीने खा दे
जिन्हां मछियां जो ढीहने खा दे
अप्पु ते तां बणा दी टपरू
बापुये दे पायो ढाह करदे
दोस्तो, असां इक्कवियां सदिया जो जा दे

हॉकी क्रिकेट खेल पुराने
इन्ना बिच क्या रिकॉर्ड बणाणे
टुटियां भज्जियां ज्ंगाह दे
क्यो असां दर्शण कराणे
जुएबाजी, छूरेबाजी नौये खेल चलाये न
हर स्कूलें कॉलेजें जरूरी ये बणाये ने
बच्चेयां जमणे बिच दोस्तो
असां विश्व रिकॉर्ड बणा करदे
दोस्तो, असां इक्कवियां सदिया जो जा दे

कोई टिप्पणी नहीं :

एक टिप्पणी भेजें