बुधवार, 20 अप्रैल 2016

बाबे बड़े परचंडी दिक्ख।।

छड सड़का,पगडंडी दिक्ख।
कदी तां जोता हंडी दिक्ख।।
धारां, रुखां, पाणिये सोगी,
कुछतां गल्लां बंडी दिक्ख।।
दोहडू पट्टू कम्मे औणे,
झुल्दी होआ ठंडी दिक्ख।।
है रोज दराटे पलदा पर,
कदीतां बलुआं चंडी दिक्ख।।
चिड़ियां औणा चोगा चुगणा,
रोणे चौलां छंदी दिक्ख।।
रिहलू, रैत, भणाला हंडे,
कदकी सल्ली, कंडी दिक्ख।।
जां दिखणे- ध्यो देवलू
आई कुल्लू- मंडी दिक्ख।।
अंग- संग रणचंडी दिक्ख,
जाई कदी बनखंडी दिक्ख।।
भेडां चारी शंभू होये,
बाबे बड़े परचंडी दिक्ख।।
तांही झूलने तेरे झंडे,
लम्बी~पक्की डंडी दिक्ख।।

1 टिप्पणी :