शनिवार, 3 अगस्त 2013

जबरा क्या करदा।


छोरु थे रड़काट जबरा क्या करदा।
पकड़ी लेई खाट जबरा क्या करदा।।

लगदा नी था हत्थ पियुले होणे न।
नठी गेई छकराट जबरा क्या करदा।। 

लब्बडां ही लश्कांदे रेह सैह दंदासे।
पुटणा पेई डाठ जबरा क्या करदा।।

पितरां दे परकोप छड़ियां छाडां भी।
बड़े रखाए पाठ जबरा क्या करदा।।

पैर भी तां सोठीया सहारें पुटदा था।
पेई गेई नाह्ठ जबरा क्या करदा।।

हुण बैडरूम तां होये नुआं पुत्रां दे।
तिसदें हेसें टाट जबरा क्या करदा।।

घट सुझदा घट सुणदा खंगदा रेह्न्दा
उम्र होई ठाहट जबरा क्या करदा।।

बणना लग्गी बिजली जे पानीये नै
जांदा रेहा घराट जबरा क्या करदा।।

जां पुज्जे सब ग्रांये नखरे शहरे दे।
मुक्के हाट फाट जबरा क्या करदा।।

कोई टिप्पणी नहीं :

एक टिप्पणी भेजें