बिल्लियां सूण घराल़ां कदकी।

रिडक़ी खड्डां नाल़ां कदकी।
बदले ले बताल़ां कदकी।।

सडक़ा आई पखले होये।
सोगी चढ़े कुआल़ां कदकी।।

मन चंदरा गास्सैं उड़दा।
पुजदा है पताल़ां कदकी।।

मुटदा पैर लुआल़ा जांदा।
जे मारदा छाल़ां कदकी।।

कदकी बड़ा गराड़ी बणदा।
जपणा लगदा माल़ां कदकी।।

बसियां जे आली मछियां।
खूब फसाईयां जाल़ां कदकी।।

डंगरे हुदे बड़े दयालु
बिल्लियां सूण घराल़ां कदकी।

तां लगदियां सोने साई।
अंबरे छुंदियां दाल़ां कदकी।।

मन मैल्ला तन लशकाए।
करदे साफ जंगाल़ां कदकी।।

कणका बांदेयां बरेया अंबर।
फेरदा कोई दंदाल़ां कदकी।।

नी खणाई जैली लगदी
चंडदा जे कदाल़ां कदकी।।

जीभ सुआदण खाणे दिक्खी।
है टपकाएं लाल़ां कदकी।।

करदी चानण हुस्ने दा।
मिल्लैं जे तरकाल़ां कदकी।